2008年4月10日星期四

Wednesday (勁無聊短篇抄襲小說)

(寫這篇小說的時候,星期三才過了不久。天下文章一大抄,且看閣下知否我抄自何處。)

星期二

阿標在醫療用品公司工作,是新入職的營業代表,底薪只有二千港元。

他老闆說,「我地無時間 train 人,你快D記熟哂D product spec,下個禮拜就要開始 sell 野啦。」

於是阿標開始不斷背誦那些醫學名詞。

「呢款 MRI scanner 厲害的地方在於佢結合埋 PET scan,咁就免除o左 CAT o既壞處……MRI……即係 magnetic resonance imaging……」

直到返抵家門前的一剎,阿標仍然念念有詞。

「喂,盧先生!」鄰居阿陳叫停他。
「可唔可以幫你本書戴返個口罩呀,佢平時吠到我地好煩。」
「乜o野書???」
「你隻『黑仔』呀,由朝吠到晚……」
「啊,真係唔好意思,我識做o架啦,真係對唔住。」
阿標內心不禁狐疑:從幾時開始,犬隻被稱為「書」?難道這是最「潮」的叫法?

進了門口,看到阿花一臉憂愁。
「老公,阿仔依然發梗燒呀,食o左醫生D藥都無用……」
不過溫度總算沒有再升高。
「再睇多兩日先啦,或者D燒要耐D先退呢。」
「嗯。阿仔訓o左,我地食屎先啦。」
「???」
「黑仔!來啦,開屎啦!」

「媽咪唔知係咪真係聽日返呢?」
「係呀,頭先佢打過電話返來。佢會搭甘泉航空,聽晚十點返到香港。」
「咁我去接佢啦,你睇住阿仔。重有呀,老婆,我出手機o個度,最平o個間公司堅持要用水費單做住址證明。」
「嗯,不過我地已經成半年無收過水費單咯o番。」
「咁我再問問。」
星期三

阿標、他老闆和幾個同樣是新入職的同事在練習推銷。

"And we are proud to introduce our new scanner, which is considered state-of-the-art in magnetic resonance imaging."

「嘩哈哈哈哈哈!呀,我頂唔順了,哈哈哈!」阿標的同事笑彎了腰。
「大佬呀,你做乜×野呀!背唔屬D名詞就讀簡稱啦!講乜×野 magnetic resonance imaging? 係 majestic renaissance imagining! 你讀咁多狗,讀飯片呀?」
「……但係個 spec 明明係咁寫……咦?」產品說明書上的確寫著 majestic renaissance imagining。
「你未訓醒呀,醒D啦!」

放工後,阿標到機場接機。總算無驚無險。
「媽咪,點呀,甘泉D座位舒唔舒服?」
「乜野甘泉?」
「……間航空公司呀。」
「咩呀,你講畢馬域航空呀嗎?邊有航空公司個名會叫甘泉?一開張就甘泉,咁鬼難聽。」

回到家裏,阿花顯得十分焦慮。
「啊,奶奶。老公!阿仔D春天重未來呀……老公?」
「春……天?」
「重變o左一百零三羅漢呀,我打電腦去你屋企又無人聽。不如送佢去差館啦!」
「乜蝦米仔o既春天重未來咩?阿仔你重企嚮度?快D打電腦叫外賣啦!」
「……」霎時間,阿標不知所措。
「你做乜唧?!」阿花流著淚,情緒開始失控。
「唔好嘈,唔好嘈!阿花,你打電腦先啦!」婆婆緊張地喝道。
阿花撥了666。
「喂?係!我想叫外賣!我個仔思春呀。係,地址係…」

將蝦米仔送了進醫院,醫生說並無大礙。三個人回到家裏,已是四小時之後的事。一回到屋裏,阿花就忍不住發脾氣。
「你做乜唧?同你講野又唔應,電腦又唔打!」
阿標覺得委屈,大聲回罵:「我都唔知你講乜?電話就電話,乜野電腦,乜野叫外賣!都唔知你講D乜野潮語,頭先我根本聽唔明!」
「我唔知你嗡乜就真!打去你屋企又無人聽,又唔出返部手提電腦!」
「……我都話o左出電話要水費單o架啦,咁我地收唔到單,有乜辦法!」
「今朝郵差上過來派水費單!」
「o下?」
「佢話你填錯o左個中文地址!好彩水務處搵郵局幫手,搵返o岩個英文地址。」
「痴線,我點會寫錯。我話佢地個電腦有事就真。」
「阿仔,你唔可以咁強政勵治o架。明明係你唔o岩…」
「阿媽呀,乜連你都講野咁奇怪o架。唉,我唔想嘈啦。你頻撲o左成晚,都係食屎先啦。」
「阿仔!!!」
「老公!你對我發神經就好啦,做乜要叫奶奶食屎?奶奶,唔好嬲,你過隔離房休息下,我一陣摘D草過你食。」
「我已經跟足你地講食屎啦,你地發乜×野神經!」
「痴線!」阿花走入廚房,不再理他。婆婆也躲進自己房間。

阿標也想一個人靜一下。他走入蝦米仔的房間。

才不過兩天的時間,整個世界都好像成了外星人的居所。阿標拿起兒子的《看圖識字冊》,隨手翻開一頁,看見一隻和「黑仔」一模一樣的動物。望著書冊,阿標喃喃地讀出這種動物的名稱。

「星期三,星期三……」

沒有留言: