Laughing 哥及其他

Laughing 哥
既然阿 Laughing 哥之死咁哄動，Facebook 嘅有關羣組已過十萬人不在話下，連教會的傳道人都寫咗篇文章來分析 Laughing 哥嘅領袖質素，我都不妨隨波逐流，噏返兩咀。

依我睇法，Laughing 哥好成功，也好失敗。

• 臥底係秘密任務，如非上頭指示，不得向他人透露身份。Laughing 刻意令阿文襲擊超 Sir，但是制止了他之後又不轉移場地，令超 Sir 於阿文面前爆出 Laughing 以前係警察嘅事實，失敗！
• 既然唔穿都穿咗，Laughing 就應該教曉阿文點樣防範考哥，但係 Laughing 並無咁做，真到臨死先叫阿文睇佢寫的 journals，失敗！
  
• Laughing 口口聲聲話要達成目的可以完全唔講感情，但係又愛上芯姐，令自己處於勾義嫂嘅位置，就算佢嘅臥底身份唔穿煲，有朝一日都可能出事，失敗！
• Laughing 雖是幫會小頭目，但以警察的身份而言，只是前線人員，不是領袖。領袖講願景，講大方向，前線人員就不得不注重細節。佢識咗羅浩楷九年，無理由唔知呢條神父口多多。明明是可以預見危險，Laughing 還多事插手藥煲婚禮的安排，引至身份敗露，失敗！
• 即使從領袖角度，亦應該衡量自己有幾多斤兩。小企業老闆要注意現金流，唔係有單就可以接。Laughing 無見好就收，逮捕天哥之後就回復身份，反而好似 dot-com 泡沫年代 D 公司咁，投入唔知幾時先有利潤（瓦解考哥集團）的生意中，絕對係失敗中的失敗！

不過 Laughing 都好掂，即使犯咗咁多錯，仍可以力挽狂瀾，用條頸鍊套出敵方對策。要不是考哥好似死亡筆記嘅夜神月咁，有超乎人類的聰明（竟然連未殺過人的人拿槍殺人時幾時要緊張都知道），Laughing 應該可以大步 larm 過。所以，Laughing 嘅死，絕對係編劇的問題，非戰之罪。

無綫劇集
唔少人批評呢套《學警狙擊》D 演員（謝天華除外）唔掂，的確一 D 都無講錯，不過這套劇比起以往的無綫劇集，在一些方面確有進步。首先是包裝。《學》劇每節的畫頭都用不同演員的片段，這個做法以前也有，但是感覺上《學》劇的畫頭好像與劇情相關，能突出每節的主角。另外，雖然此劇主題歌的詞跟唱都唔掂，不過曲子本身的風格卻十分切合警匪片，算是警匪片的主題曲中比較好的一首。最後，此劇很恰當地從不同角色的視角重構 Laughing 身份敗露的過程，是無綫劇集中罕有地細緻的敘事手法。這種手法以往在其他劇集中也用過，不過以節奏而言，這次掌握得最好。加上事件各方的倒敘除了回憶之外，亦逐步顯露了各自的計謀，這大大增加了劇情的張力，值得一讚。

LOHAS Park
如果唔係地鐵興建康城站，我都無留意 LOHAS 原來係簡寫，全寫係 lifestyles of health and sustainability！其實我好有興趣知道，究竟為香港一眾樓盤起名的是甚麼人，竟然可以將 D 名越改越離譜。

話時話，如果唔係地鐵興建康城站，我亦唔知「日出康城」喺邊庶。哦，原來喺將軍澳 …… 堆填區 …… 唔怪得叫「溢出康城」（D 污水或沼氣），而隔籬個樓盤又為咗殺哂 D 污糟嘢，叫「手刀」。