兩人天九輸到褲都甩

跟祖母打了一小時天九，輸到褲都甩。雖然目的是讓老人家開心，但我牌運太差，真係玩到無哂心機。

她：試過八支牌（重要係佢做莊）、兩次至尊、兩次擒我山雞。
我：只得一次至尊，此外唔係畀佢食住，就係我的牌爛到無倫，譬如最好個隻都只係長三。最激氣係有次出剩五隻牌的時候，我攞住天九、單地加孖人，諗住坐定粒六有得結，點知佢出三鵝五加雜七，搞到我煲粥，真係頂你個肺，差點吐血！另外有次我做莊，難得攞住四人七，另外四隻卻是超爛牌，結果大家各得四戙，一毫子都賺唔到，吹啤脹。（更揼心係事後才想起計錯數：兩個人玩，必有一個做莊，所以四大賀最少都收八戙，唔係四戙！）

兩人玩天九同四人玩好唔同。最吊詭的是四人玩時結者一般都贏錢，但兩人玩時，可以我結但係你贏錢。（給不懂天九的朋友：「結」即是贏了一局，贏了牌局但輸錢，你說吊不吊詭？）更恐怖的是，由於只得兩個人玩，隨時都可以加幾個莊。若果你加了 n 個莊而每次都贏唔到錢，每戙變成以 n+1 倍計，要守住歸本的壓力就變得奇大。因此，兩個人玩時，有時就要考慮如何巧妙地輸。總之，兩人玩同四人玩的策略好唔同，加上節奏明快（我同八十幾歲的阿婆玩，連洗牌同派牌都可以一個鐘頭玩十八鋪），很適合用來 kill time。