團購香港基金

David Webb 日前踢爆老董於1999年，准許美國以一筆過四千四百萬文的價錢，續租駐港總領事館現址999年，其間美方重可以賣該地賺錢。既然中國誓要佔領香港，唔畀香港獨立，港人不如當買渠怕，畀筆錢過渠，租起成個香港999年自己管理，就當有人收陀地。

咁做要幾錢？

香港全土總面積略少於300億平方呎，領事館總面積則為308595平方呎。按地積比例計，香港人要交 (300億/308595)×4400萬 = 42775億陀地畀阿公，先可以租返自己個場來做。現時香港總人口大約740萬，其中約83%係成年人。以六四比例計，有四成係二五仔。若餘下六成人肯齊心，每人都要夾 42775億 / (740萬 × 0.83 × 0.6) = 116萬先夠皮。

統計處並無香港人資產的統計。根據瑞信2016年估算，香港成年人平均資產為145萬港元。145萬只係略多於116萬，而且重包括不動產，所以驟眼睇來，買起香港呢條橋行唔通。不過，領事館位處CBD，香港其他地方無奶油都係租咁貴。況且，就算無錢租999年，淨係租99年唔使班中國人喺香港搞搞震都好。就當只租99年租金減半，拉匀全港租金又當係CBD租金的7折。咁樣，每個非二五仔的成年人，只需科款41萬就夠，都唔係無得諗。

謹此呼籲董生，幫香港人成立一個「團購香港基金」，同阿公斡旋，回租香港99年。畀我等「自己個場自己睇」，還香港人一片淸靜。