舐嘢啦，撤退啦

很難受。

警方設局請君入甕，又真的有人入甕，然後一衆老早被收編的媒體又將事件無限放大，不提其他。那班本來就對抗爭者有偏見，只要唔係死到臨頭，都寧做順民不要歷亂的叔伯師奶，就更加難拉攏。

唔係講笑。鼓吹「以國家名義殺人，無罪」的何君堯搞撐警集會當日，我在茶餐廳食飯。當時大台新聞正在直播實況，忽然廚房佬從廚房大叫，「如果我唔使返工，我都去撐警呀！」然後老闆娘坐在櫃檯呼應：「係啦，唔使開舖嘅話，我地舖頭起碼有三個人會去！」跟住老闆娘、廚房佬同另一個茶客就咁不斷數落反送中的示威者。有些論調本身不難理解，例如示威會阻住人揾食，警察都有任務在身等等。不過最令我驚奇的，並非他們的價值觀，而是他們對現況的理解。從他們的談論中，我發現，他們是非常，非常真心地認定：

1. 反送中示威者普遍都係好暴力，黐哂線咁掟磚，搵鐵通打警察。
2. 反送中示威者好一部份都係收咗錢遊行。
3. 逃犯條例的修訂，真的是為了填補法律漏洞，解決台灣殺人案。我聽到老闆娘好唔忿氣咁問：「點解D人要幫箇個殺人犯？」
4. 條例的修訂，根本不會影響一般市民。

至於警察濫用暴力（甚至違法施暴），公報私仇，或台灣早已聲明條例一旦修訂，亦不會接受有關安排，甚至條例修訂前，已有銅鑼灣書店老闆遭中國「强力部門」非法越境擄人，再砌詞入罪等等，他們都渾然不覺。

本來已經難溝通，今次再有示威者真的衝入會議廳，予人口實，我都唔知講乜好。共產黨本來就擅長政治宣傳，顛倒黑白，今次更加大條道理扮正義。

我普通一個中年大叔，無資格對衝入會議廳的朋友指指點點，但是忠言逆耳都要講句：老友，今次舐咗嘢啦，撤退啦。贏了戰役（進佔會議廳），卻輸了（爭取民心的）戰爭，又有何益？