從前有位喺中環返工嘅師奶，因業務邂逅一位喺西環返工嘅阿叔。由於生意上嘅規矩，理論上二人只應保持㸃到即止嘅關係，但唔知㸃解，二人愈走愈密。
有日，阿叔突然笑騎騎同街坊講，「中環西環行埋一齊幾好」，重話呢個係渠同師奶嘅共同心聲。之後渠重同師奶含笑牽手，令一眾街坊O晒嘴，紛紛問「行埋一齊幾好」究竟是現在完成式，抑或係表示願望嘅未來式。
之後，這位自詡「好飲得」嘅師奶，就頻頻於公開場合同阿叔暢飲，談笑風生。
一年過後，正當街坊仍在揣測二人有乜瞹昩嘅時候，師奶竟喺一個博物館剪綵儀式上，拒絕同阿叔握手。人人敬重嘅鄉紳誠哥當時在場，就向二人伸手，欲將二人嘅手搭在一起。儘管阿叔陪笑遞手，師奶卻不賣賬，望望手錶就話趕時間離開，搞到一眾街坊如墮五里霧中。師奶究竟係反臉（及為何反臉）抑或 tsundere？我們並無答案。
時移世易，物換星移。又一年過去，阿叔生意失敗，潦倒回鄕，於家鄉圖書館搵咗一份編寫地方志的工作。師奶有些生意對手，以為師奶必受牽連。誰知師奶違背了他們的期望，屹立不倒，除了間中打小報告向大老闆投訴自己的同事外，繼續做女強人。善忘的人們，很快就不再深究阿叔同師奶以前的關係。
近日，師奶的生意出現大危機。不知是否壓力太大，守不住心防，師奶有感而發，謂：「如果飲醉少少，會有更加親密行為，係高風險。」
（完）
沒有留言:
發佈留言