午飯時間，到附近茶餐廳叫了個快餐。一位師奶坐在我後面的卡座。
女伙記拿來食物，然後問後面的師奶：
「喂，好多人睇左都喊喎，你有無喊？」
「無喎，其實都無乜感覺。反而係羅文走個陣就覺得好難過囉…」
平日無乜兩句的我，呢個時候唔知點解忽然轉左入粉絲 mode。
「咦？我都係喎！你尋日有無睇？羅文都有上台唱呀…（下刪數十字）」
斜對面位阿叔白了我一眼。
第一次覺得自己好八婆。
(2) 當自私的我遇上自私的你
在走廊同 F 狹路相逢。
「喂！靚仔！」
「咦？乜你唔係走左呢咩？」
「哦，我做埋下個月尾，而今重有點手尾執咁啦。」
「咁你一定好得閒啦！咁就好，有野想搵你幫手。」
「o下？」
「想搵你幫我睇下 D 英文。」
o下？我 D 英文好雞個喎，個幾月前中大有位老細先 o係一篇我寫 o既野度批注「呢 D 算係乜野英文？」查實你搵而今 D 後生 o既幫你執重好啦。雖然佢地 D 英文程度好 M 型分佈，但係好個班 D 英文真係好到嚇死你。
F 用我的電腦下載了 10MB PDF 文件。
「就係呢份功課。可唔可以幫我做左佢？係 final year project 來的。」F 正在工餘時間修讀一個學位課程。
「………………………………」
「哦，唔得就算啦。咁我做完之後搵你幫我改好唔好？」
「……」唉，好啦。
(3) 當此方的我沒遇上彼方的你
上網看馬家輝的 blog 「稿紙以外」，任由本僱員的生產力流失。以下節錄兩小段：
有冇搞撚錯呀巴打你駛唔駛死得咁死黑色幽默?R.I.P., 羅老闆。
你係唔係慌死大家唔記得你所以專登要搞埋0的咁0既0野?
你答我鴉, 喂, 羅志華。
報紙話你在整理貨倉時被從晝架上跌落0黎0的書責死,
世事有冇咁巧合呀大佬真係虧你做得出來。
賣了幾十年書, 賣到書店執笠, 獵犬終須山上喪, 書商終被書壓死,
雖然命短兼命苦, 但亦算係求仁得仁死而無憾,
至少, 香港開埠以來, 你可能係第一個被書壓死的倒閉書商,
歹命如此卻又好運如此, 真是教人哭笑不得。
(4) 當懵懂的我遇著懵懂的你
晚上十點鐘，正在搞動放低左成個月，被中大一位老細稱為「呢 D 算係乜野英文」的英文字母湯。
Knock knock …
（我個位偉大同胞 office mate 好驚奇，因為佢 D 偉大同胞朋友入來的時候係從來都唔敲門的。）
「搵邊位？」
「我搵 The suffocated。」
「你地係…」
「A 介紹來的。」
o下？我又唔係教書的，點解來搵我？
「A 話呢科以前係你教佢的。」
係咩？諗諗下又好似有 D 咁o既事。不過到我想起這起碼是十幾年前 o既事的時候，我已經搭緊西鐵返屋企，而且以前又唔係 o係呢間學校教…
「唔，係咪架，唔好 o勒，冤有頭債有主，你地報上名來，我聽日問下 A 係咪真係佢介紹你地來 o既先？」
「Urrr, 我叫 XX。」
「我叫 YY。」
其實係又點唔係又點？諗返轉頭發覺自己真係蠢。
「好啦，乜野事？」
「第三題我做到呢度就咁咁咁…」
「o下？條題目 o係邊度？」佢淨係掛住講佢點 solve 條 problem。
「啊…o係呢度。」
五分鐘後。
「…唉，都係搞唔掂。你地有無試過最簡單 o既方法？」
「…乜野係最簡單 o既方法？」
o下？咁都唔知？到底我應該讚你地誠實定係很傻很天真？
「打條題目入 Google 度，睇下有無人做左答案。」
幾分鐘後。
「唉，無答案。不過呢度呢個例證明左個 graph 起碼有三個，而且重唔一定係 wheel graph。另外呢度竟然有篇 journal paper 研究呢個問題，即係話第二題個答案唔係咁簡單。可能出題目 o個個搞錯左。」
「係 L 出過喎。」L 係我老闆。
「……哦，可能佢想專登試下你地。」
「…………」
「唔，都係睇返第三題啦。」
十五分鐘後。
「唔唔…」
「唉，都阻左你好多時間，得架啦，由佢啦。真係唔好意思。」
「呀，唔係！我幫唔到你，係我唔好意思就真…」真係瘀到爆。
他們走了之後，我冷靜下來，才發現自己連題目內某個基本概念的定義都搞錯了。畢竟已沒有碰這些東西十年以上。在西鐵上，我把問題解決了。還是明早找找 A，看看怎樣收拾事情吧。
沒有留言:
發佈留言